Üç ildir axtarışda olan Atalay Filizin yaxalanması Türkiyədə səs-küyə səbəb olub. 3 qətldə şübhəli bilinən Atalay Filiz dünən həbs edilib. Onun həbsi ölkə mediasında müzakirələrə səbəb olub. Belə ki, polis məmurlarından biri bölməyə aparılan Filizlə selfi çəkdirib və bunu sosial şəbəkədə paylaşıb. Hətta o, qatilə: "Səni təbrik edirəm. Bu məmləkətdə üç il qaça bilmisənsə, sənə deməyə söz tapmıram", - deyib. Məlumata görə, polis artıq vəzifəsindən uzaqlaşdırılıb və haqqında araşdırmalara başlanılıb. Məşhur müğənni Özcan Deniz ötən günkü İnstaqram paylaşımı ilə diqqət çəkib. Belə ki, o, qatilə bənzəyən aktyorla "selfie"çəkdirərək sosial şəbəkədə yayıb. Müğənni fotoya qeyd olaraq yazıb: "Qatili də gördük, bir "selfie" də biz çəkək... Dostlar, bu oğlan bizim köməkçi aktyorumuzdur. Qatilə çox bənzədiyi üçün onunla şəkil çəkdirdim. İnşallah, xasiyyəti bənzəməz". Qeyd edək ki, Atalay Filiz interpol tərəfindən də axtarışa verilmişdi.
↧