Hindistanın cənub-qərbindəki Manqalur şəhərində yerləşən "St. Aloysius Autonomous College"də oxuyan tələbə qızlar ölkə hökumətinə şikayətləniblər. Onların dediklərinə görə, kollec rəhbərliyi çoxsaylı qanunsuz qadağalar tətbiq edir. WSEMIR.COM Times of İndia-ya istinadən bildirir ki, müəllimlər dərslərdən sonra tələbə qızları yığaraq onlara "yalnız qızlara aid tabular və yasaqlar siyahı"sını oxuyublar. Siyahıya görə, tələbə qızlara saçı açıq və əksinə, hörüklü şəkilddə gəzmək yasaqlanır. Parlaq manikür, tatuaj, kosmetika, çantada makiyaj vasitələri daşımaq qadağandır. Qadağalar arasında kollecdə ad günlərinin qeyd olunması, əks cinsə mənsub olan tələbələr və ya müəllimlərlə ünsiyyət, dərslərdən sonra kampusun ərazisində qalmaq, ağacların altında oturmaq da var. Yasaqları ilk dəfə pozanı 500-1000 rupi məbləğində cərimə gözləyir. "Pozuntu" təkrarlanarsa, tələbə qız kollecdən xaric edilir. Kollecin sabiq tələbəsi, hazırda CNN-IBN-də jurnalist olan Satşya Anna Tarien Facebook səhifəsində və bloqunda sözügedən "qadağalar"dan bəhs edib. "Əfsuslar olsun ki, bəhs etdiyim yasaqlar Hindistandakı bir çox ali təhsil müəssisələrinə xas bəladır. Rəhbərlik yasaqları "tələbə qızları zorakılıqdan qorumaq üçün" tətbiq etdkilərini deyirlər. Halbuki yasaqlar patriarxal tabuları daha da dayanıqlı edir", - Satşya yazıb.
↧